საინფორმაციო-ანალიტიკური სააგენტო - Information-Analytical Agency - Информационно-аналитическое агентство

ყველას დაჟინებით მოვუწოდებ,რომ სალომეს კონსტიტუციის დარღვევაში ხელი არ შეუწყონ! – საერთო მედია
მაისი 20, 2024

ყველას დაჟინებით მოვუწოდებ,რომ სალომეს კონსტიტუციის დარღვევაში ხელი არ შეუწყონ!

ვინც თავს საქართველოსა და ქართველი ხალხის მეგობრად თვლის, მათ დაჟინებით მოვუწოდებ, რომ ქალბატონ სალომეს საქართველოს კონსტიტუციის დარღვევაში ხელი არ შეუწყონ, – ამის შესახებ საქართველოს პარლამენტის თავმჯდომარემ შალვა პაპუაშვილმა ჟურნალისტებს განუცხადა.

„პრეზიდენტის ყველა კეთილის მსურველს ვურჩევ, რომ მას ურჩიონ – არ გახსნას საქართველოს კონსტიტუციის დარღვევის პანდორას ყუთი. ეს ჩვენს ქვეყანას არ წაადგება და პირდაპირ წინააღმდეგობაში იქნება ჩვენი ქვეყნისა და ხალხის ეროვნულ ინტერესებთან. თუ ერთი კონსტიტუციური ორგანო სისტემატურად და განზრახ დაიწყებს კონსტიტუციის დარღვევას, ეს იქნება პრეცედენტი, რომლის გადალახვაც ძალიან რთული იქნება შემდეგ, რადგან პრეცედენტებს აქვს ძალიან ცუდი თვისება – როცა ის ერთხელ დამკვიდრდება, შემდეგ შეიძლება სხვასაც წაუცდეს ხელი, რომ დაარღვიოს კონსტიტუცია, თუკი განსაკუთრებით ასეთი მაღალი თანამდებობის პირისგან ხდება ასეთი უპატივცემულობის გამოვლენა. რა თქმა უნდა, ამას აქვს მეორე მხარეც, თუ ქალბატონი სალომე სხვა ქვეყანაში გაემგზავრება. ვინც თავს საქართველოსა და ქართველი ხალხის მეგობრად თვლის, მათ დაჟინებით მოვუწოდებ, რომ ქალბატონ სალომეს საქართველოს კონსტიტუციის დარღვევაში ხელი არ შეუწყონ. სხვა ქვეყნებისგან ქართველი ხალხის მიმართ პატივისცემა გამოიხატება არა მხოლოდ და არა იმდენად ჩვენი ბუნების, კულტურის და ა.შ. პატივისცემაში, არამედ უპირველეს ყოვლისა გამოიხატება – საქართველოს სახელმწიფოსა და კონსტიტუციის მიმართ პატივისცემაში.

ჩვენს კულტურასა და ბუნებას ბევრი სცემს პატივს, მათ შორის ჩვენი არაკეთილმოსურნეებიც. პრობლემა მაშინ არის, როცა ჩვენს სახელმწიფოს და ჩვენს კულტურას პატივს არ სცემენ. ამიტომ, რა თქმა უნდა, ასეთი გამგზავრება თუ შედგება, მიმღები მხარე ქართველი ხალხისა და კონსტიტუციის მიმართ უპატივცემულობას გამოიჩენს, რაც არც მეგობრობასთან არის შესაბამისი და არც რაიმე სახის ღირებულებასთან.

ქალბატონ სალომეს დაჟინებით მოვუწოდებ, რომ არ დაარღვიოს კონსტიტუცია, რაც უკვე არის დადასტურებული ფაქტი. თუ არჩევნებში სალომე ზურაბიშვილის მონაწილეობაზე გეგმები სადმე იხარშება, ეს კიდევ ერთხელ კონსტიტუციის დარღვევაა – მას ის პოზიცია აქვს, რომელიც უნდა იყოს ზეპარტიული და ნაცვლად იმისა, რომ ამ სტატუსს გაუფრთხილდეს, უკვე ფაქტია, რომ პირდაპირ გადაეშვა პოლიტიკაში და არის ცალკეული პოლიტიკური ჯგუფების მფარველობის ქვეშ, რაც ჩვენ პარლამენტში ვიხილეთ. გარდა ამისა, არის ცალკეული პოლიტიკური ჯგუფებისთვის პირდაპირ პოლიტიკური დღის წესრიგის გამტარებელი. რაც შეეხება 2024 წლის არჩევნებს, მგონი, უკვე აქედანაც კარგად ჩანს ბევრი რამ. 2024 წელს ქართველ ხალხს ექნება არჩევანი ერთი მხრივ ანტიქართულ კოალიციასა და „ქართულ ოცნებას“ შორის. გასაგებია, რა არჩევანს გააკეთებს ქართველი ხალხი. ქართველმა ხალხმა ეს არჩევანი უკვე ბევრჯერ გააკეთა და ამ არჩევანს გაიმეორებს. ანტიქართულ კოალიციას ქვეყანაში გასაქანი არასდროს არ აქვს“, – აღნიშნა პაპუაშვილმა.

რა გეგმა აქვს პრეზიდენტს და დარჩება თუ არა ვადის ამოწურვის შემდეგ ქართულ პოლიტიკაში – ამ კითხვას პასუხს თავად სალომე ზურაბიშვილი გასცემს. პრეზიდენტი დღეს სავარუდოდ მედიისთვის ბრიფინგს გამართავს. მისი პოლიტიკური გეგმები კიდევ უფრო აქტუალური მას შემდეგ გახდა, რაც პრეზიდენტმა დახურულ კარს მიღმა ოპოზიციისა და მესამე სექტორის წარმომადგენლებს უმასპინძლა. პოლიტიკური გეგმების პარალელურად საინტერესოა გააგრძელებს თუა რა პრეზიდენტი ვადის ამოწურვამდე მთავრობასთან შეუთანხმებელ ვიზიტებს.